पिंपरी : येथील डॉ. डी. वाय. पाटील वैद्यकीय महाविद्यालयाचे नेत्ररोग शल्य चिकित्सक डॉ. अभय लुने यांनी नुकतीच झुरिच (स्वित्झर्लंड) येथे झालेली ‘आयर्नमॅन २०१९’ स्पर्धा यशस्वीरीत्या पूर्ण केली आहे. ही स्पर्धा पूर्ण करणाऱ्या आठ भारतीयांमध्ये त्यांनी तिसरा क्रमांक मिळवला. जगातील अत्यंत कठीण स्पर्धांमध्ये या स्पर्धेचा समावेश होतो. या स्पर्धेत ३.८ किमी जलतरण, त्यानंतर १८० किमी सायकलिंग आणि शेवटी ४२ किमी धावणे या तीन प्रकारांचा समावेश होता. ही स्पर्धा १६ तासांच्या आत पूर्ण करणे अपेक्षित होते. डॉ. लुने यांनी १४ तास ३२ मिनिटांत ही स्पर्धा पूर्ण केली.
जगभरातील एकूण दोन हजारांहून अधिक स्पर्धक यात सहभागी झाले होते. भारतातून वीस स्पर्धकांनी सहभाग घेतला होता. त्यापैकी आठ स्पर्धक ही स्पर्धा पूर्ण करू शकले. त्यात डॉ. लुने यांनी भारताच्या क्रमवारीत तिसरा क्रमांक मिळविला. ४५ ते ४९ वर्षे वयोगटात त्यांनी २११वे स्थान प्राप्त केले.
‘डॉ. अभय लुने यांनी झुरीच येथे झालेल्या आयर्नमॅन स्पर्धेत मिळविलेले यश फारच कौतुकास्पद आहे. त्यांच्या या कामगिरीचा आम्हाला अभिमान वाटतो. डॉ. डी. वाय. पाटील विद्यापीठातील खेळाडू विद्यार्थ्यांसाठी ते प्रेरणास्रोत आहेत. या स्पर्धेत भाग घेणारे डॉ. डी. वाय. पाटील विद्यापीठातील ते एकमेव प्राध्यापक आहेत,’ अशा शब्दात महाविद्यालयाचे अधिष्ठाता डॉ. जे. एस. भवाळकर यांनी आपल्या भावना व्यक्त केल्या.
विद्यापीठाचे कुलपती डॉ. पी. डी. पाटील व उपाध्यक्षा भाग्यश्री पाटील, कोषाध्यक्ष व ट्रस्टी यशराज पाटील यांनी डॉ. अभय लुने यांचे अभिनंदन केले व पुढील यशस्वी वाटचालीसाठी शुभेच्छा दिल्या.
डॉ. अभय लुने यांनी आतापर्यंत मुंबई मॅरेथॉन, लडाख मॅरेथॉन, सातारा हिल मॅरेथॉन, कोल्हापूर हाफ आयर्नमन अशा स्पर्धेत भाग घेतला असून, गिर्यारोहणाचा अभ्यासक्रम पूर्ण केला आहे. एव्हरेस्ट शिखर सर करण्याचा त्यांचा मानस आहे. आयर्नमॅन स्पर्धेतील यशाचे सारे श्रेय त्यांनी कुटुंबीय, मित्र व सहकारी यांना दिले आहे. प्रशिक्षक सुनील मेनन यांचे त्यांना मोलाचे मार्गदर्शन लाभले.
